Blog-Iträg
Alles was passiert und mir dur de Chopf goht landet do ine. Fruscht und Freud wird vereint.
17.11.09 / 10:48 Ortszyt
Obdachlos und kes Bett me....
Ez isch es doch endli sowiit dass mis Huus chan umbaue werde nach dere lange Planigsphase. Irgendwie isch mir glich chli mulmig ir Magegegend. Zumal i ja mis komplette Schlofzimmer temporär verlore ha und ez nur no notdürftig pfuuse, sofern mer dem überhaupt chan pfuse säge. Sit zwei Nächt hani chum es Aug zuetue.
So lauf i ez scho nachere knappe Wuche Bauzyt scho ufem Zahfleisch. I hoffe, dass i mi gli a die Situation gwöhne. Susch mues mi eifach d Vorfreud uf mis nüe Schlofgemach und Büro dur die Zyt dure träge.
16.10.09 /13:13 Ortszyt
Glück mues mer ned ir Ferni sueche, wenns doch so nah liit
Es isch mir mol wieder bewusst worde, dass es ned vill brucht zum glücklich si. Es sind die chline Sache im Alltag wos Läbe läbenswert mached. mer mues sich nur Zyt neh anezluege. Was nützts eim uf unereichbars Glück zplange mit vill zGrossem Massstab, wenn mer debii die reale und alltägliche Glücksmoment überseht?
Also eifach gnüsse und glücklich si.
26.08.09 / 10:21 Ortszyt
Akute Virebefall macht mir s Läbe schwer
Agfange häts bi mim herzige chline Netbook Fridolin. Der hät frisch fröhlich Spammails verschickt, bis ich ned mol me ha chönne Maile. Ok, nachdem i denkt ha, dass i alles killt gha ha, häts mir grad no d Feschtplatte butzt. Villicht hani doch chli zu vehement mini Bootvire killt. Jva hät au no grad e Trojaner uf ihrem Laptop gha, der hät sich strickt gweigered glöscht zwerde. Mues die Chischte wohl nü ufesezte.
Uf jede Fall hani ez voll d Virephobie und check alles zig mol über verschideni Spy-, Vire-, Trojaner- und suschtigi Software. Bi grad dra min alte Laptop zprüefe. Der lauft so heiss vo dene Vireprogramm, dass er grad abstellt. Grmpf! Han ez halt no e extrene Venti aghänkt. Aber der Kampf de Vire isch agseit, i mach alli z Bode!!!!!!
23.07.09 / 8:37 Ortszyt
Mini Vorschläg für Gsetzeänderige
Im Strosseverkehr lauft ja einiges eher chaotisch als harmonisch und entspannend. Und ich mit Skates oder Zweirad unterwegs bi eifach immer der Schwächer und mängisch hani s'Gfühl, dass es s'einzig Zyl vo de Autofahrer isch, mich über de Huufe zfahre. So hani entschiede, dass ich gsünder und länger läbe, wenn i uf de Stross skate und Trottoir wiitrümig miide tue.
Aber de Grund woni mi eigentli ufrege isch, dass i geschter Obe, woni mitem Töff uf Wiifelde gfahre bi, im Fyrobigvercher notorischi z'Langsamfahrer und landwirtschaftlichi Fahrzüg vor mir gha ha. Wo i de ufem Ricke endlich der notorisch 40 km/h Fahrer ha chönne überhole isch natürli nüt anders dri ghockte als e scho bald schiitote Bappeli. Hinter sich häts natürli e riise Kolone geh. De hani mol paar km fryi Fahrt gha, de hani e Traktor vor de Fressi gha und dezwüsched öppe no 20 Auto. Super, do chumi ned mol mitem Töff so eifach führe. Irgendwenn isch die Hürde au gschafft gsi und promt stoht wieder so e Traktor mit mega Ahänger am Afang vor de Kolone. I ha schier i Länker bisse. Chan mer dene Buure eigentli ned verbüte während em Fyrobigsvercher d'Hauptsrosse znutze? Das macht Fahrer nur agressiv und es mutiered us eigentlich gmüetliche und relaxte Fahrer richtigi Verkehrsrowdis. Nach 1.15h bini denn doch endlich in Wiifelde acho. Bi scho huere glade gsi fürs Training. Und nachher bini no gladner wieder heigfhare, ha denn aber nur 50 min brucht :D und mues zueghe, es hät mi ke Polizii derfe gseh...
Also mini persönlich Gsetzesreform:
- Verbot für Landwirtschaftlichi Fahrzüg zu Stosszyte zwüsched 7.00 - 8.00h und 16.00 - 18.00h
- Strofe bis hi zu Füehreruswiisentzug für z'Langsamfahrer mit Toleranz vo 5 km/h
- Strosse fry für Inliner, es passiert vill weniger, wenn mer uf de Stross skatet!
14.07.09 / 10:54 Ortszyt
Ha e Bronzemedaille becho a de Marathon Schwiizermeischterschaft
Hui, nach dere derbe Niederlag in Einsiedle hanis ez doch gschafft a de Marathonschwiizermeischterschaft e Medaille zhole. Im Sprint simmer chli im Durenand gsi, aber isch ufgange und i bi grundsätzlich zfriede mit em Ergebnis. Es hät mi vor allem gfreut, dass Brasils so e riese Freud gha händ dass Livia und ich ufem Podescht gsi sind.
Für alli wo no nie e Medaille vonere Schwiizermeischterschaft gseh händ chönd ez do im Bild mol luege wie so öppis usgseht. Nur ei Frog blibt no offe: Simmer ez Inlineskater oder Isschnelläufer?
08.05.09 / 13:25 Ortszyt
Hilfe! Zyt überrännt mi
Irgendwie hani so vill im Chopf woni wett schriibe aber Zyt lauft eifach wiiter, ohni uf mich z'warte. Passiert isch wieder einiges. Erscht mol isch ja s Wetter so leid gsi, dass i mit miner Mueter nomol in Süde gflüchted bi und zwar uf Mallorca. Die Wuche hät ned nur em Training gulte, sondern eher fürd Erholig und zum e gueti Zyt mit mine Kollege zverbringe woni scho mängs Johr nümme gseh ha. Die Wuche isch so schnell umme gsi, dass mi dihei grad wieder der Alltag packt hät. Priorität hät denn em Schaffe gulte.
Sportlich bini au scho wieder id Saison gstartet. Vorwiegend bini Velorenne gfahre, das liit mir momentan besser. Au hani a de Hulfteggstaffete mis erschte Bikerenne hinter mich brocht. Bi halt scho e Pfiife gsi wos nitzi gange isch. Berguf hät i guet möge mithebbe. Ha mi ez entschiede am Sunntig jewiils chli Downhill zfahre zum mi entspanne (oder eher verchrampfe?).
Mis Huus isch au mol wieder inere Umbauphase. Das heisst d Planig für de Umbau isch gstartet. Das wird au no chli Zyt in Aspurch ne, aber i freu mi ez scho usiinig ufs Endergebnis.
05.03.09 / 20:27 Ortszyt
De Früehlig hät üs glaub vergesse...
Wenn i do vo de wame Stube zum Fenscher us luege, de gseh i grossi Schneeflocke. Das betrüebt mi scho chli, es wär würkli öppe Zyt dass de Frühelig chunnt. So chani mi gar ned motiviere zum Trainiere. Usserdem isch ja am Sunntig no de Engadiner Skimarathon, und i bi das Johr no gar nie uf de Langlauflatte gsi. Das wird mir wieder es Liide geh uf den 42 km. Aber i machs ja us Plausch und de chas au guet sii, dass mer mich am Loiperand am Fötele atrifft :-D.
Zum min Winterkoller überwinde hani defür chönne es nüs Bike uswähle. Ok, mitlerwiile mis vierte Velo im Chäller :-D, Aber mer brucht halt scho so vill Velos, well je e Renner und es Bike für guets oder schlecht Wetter isch Minimalaforderig ;). Ez freu i mi druf, wenn mis nüe Bike denn nägscht Wuche sett glifered werde.
17.02.09 / 12:12 Ortszyt
Brrr, eifach nur no grusig!
De Schnee und das grusige Wetter hät mi zrugg. Ungern bini vom Paradies weggfloge. Ned nur wegem Wetter wär i no gern uf miner Insle blibe. Han au mini Mitbewohner sehr is Herz gschlosse. Sie händ mi so lieb ufgno gha.
Nachdem i geschter wieder min erschte offizielle Arbetstag gha han und mi grad für 14 Stund im Büro vergrabe ha, gseh i hüt wieder langsam übers Chaos us. Zum de Kulturschock no perfekt z'mache bini am Sunntig no mit der Kamera ufem Buggel über de Büchel gloffe und ha die Schneelandschaft feschtghalte.
 |
 |
 |
 |
 |
 |
| ohni Wort... |
3.02.09 / 17:19 Ortszyt
Biketour zum Stausee Chira
Es isch eifach der perfekti Tag gsi. Zerscht bini zwar chum us de Federe cho. Bi au ned so motiviert gsi die Tour eleige zfahre, aber die Gfühl sind de schnell verfloge gsi woni lospedaled bi. Die Stiigige mit bis zu 22% händ mi de scho wach gmacht. Und falls das ned glanged hät isch no so e chline giftige Kläffer hinter mir her gschosse, dass i voll id Ise ha müese stiige Berguf zum ned no gfresse werde. Aber de hät e iidrücklichi Welt agfange. Die Insle hät so vill schöns zum gseh, do weiss mer gar ned wo mer überall sell aneluege. I jedi Schlucht womer inefahrt isch es wie es Iitauche ine anderi Welt. Scho gli mol isch ke Stross mit Asphalt me umme gsi und i bi e Weg mit roter Erde wiitergfahre. Recht agnehm isches gsi, wells nümme grossi Stiigige gha hät und de Bode relativ weich gsi isch, dass i au mit mim Hardtail ha chönne komfortabel Velofahre. Ok, de Komfort isch de gli mol vergesse gsi, denn ischs würkli nur no über Stock und Stei gange und i ha vome Fully-Bike träumt, jedesmol wenns mir wieder de Sattel zwüsched Bei gschlage hät, oder i wieder de quereweg übers Züg us grutscht bi.
Candlelight-Dinner am Stausee
So richtig entspannt hani de bim Mittagesse am Stausee Chira. Mi Rucksack hät zwar nur es Chäsbrötli und e Banane hergeh, aber es isch mir vor cho wie es Candlelight-Dinner. Und wie abgmacht isch genau i dem Moment de Dennis mit siner Bikergruppe anegfahre. I ha scho müese schmunzle woni gseh ha mit was für Antisportler er sich hät müese abquäle. Die schnellere Biker i siner Gruppe sind au liecht agnervt gsi, dass es settig debi gha hät, wo ned mol rächt händ chönne d'Schaltig bediene. Do bini eigentlich doch recht froh gis, dass i elei unterwegs gsi bi und uf niemer ha müese rücksicht näh.
Nach dere Pause hani no de letscht Hoger in Agriff gno bis uf 1200 Meter ufe. D'Wulche sind mir immer nöcher cho und de hani churzfrischtig entschiede über San Bartolomé zrugg zfahre. Han mir bim Abeflitze würkli schier öppis abgfrore, aber zum Glück isch es zwüschedure immer wieder chli oppsi gange zum mi ufwärme. De letscht Ufstiig nach em Dörfli Fataga isch happig gsi. Ok, i bi selber Schuld, i ha au no müese e Gruppe Rennvelofahrer überhole und de e churze Machtkampf mit dene usmache. Aber hauptsach i bi zerscht dobe gsi :-D
Abschiedsdrunk
S'Timing hät au wieder gstumme woni de dihei acho bi. Genau denn sind die erschte Happy-Biker au dunne gsi - sie händ ja die Tour in umgekehrter Richtig gmacht. I ha schnell s'Velo is Stägehus versorged und bi no schnell überd Stross id Bar zum eis go Trinke mit ihne. Es isch de fascht no e halb Stund gange bis au die letschte Biker meh oder weniger ohni Sturz de Hoger abe cho sind. I de zwüschezyt händ sich au no e Gruppe Freemotioner id Bar igfunde. So häts doch no für e heisse ColaCao glanged zum die verstrampelte Cholehydrat wieder nachezfülle.
 |
 |
 |
| mis Bike i de Pampa | geniali Wägli zum Bike | Stausee Chira mit em Roque Nublo im Hintergrund |
27.01.09 / 18:24 Ortszyt
Fraue und Fische... ;(
Die Fischerii goht mir hüt ordentlich uf de Senkel. Bi ez ja scho s'dritt Mol go fische. Zerscht Mol hani immerhin vier Fisch hei gschleppt. S'Mol druf bini nur ganz churz go fische, aber wells nüt bisse händ, bini wieder hei. Und hüt bini mit em Käthy go fische. Hät scho schlecht agfange, denn i bi voll uf de kläbrig, eklig Köder ghocked. Und de hani es usinnigs Gwirr uf der Spuele gmacht, dass i sogar ha müese Silk useschniide. De Chübel hani au ned mit Wasser chönne fülle, wells so gwellned hät, dass i fascht inegfloge bi. Zum Glück hät mir min Fischernochber Antonio mit eme Seil ghulfe zum Wasserschöpfe. Bi de scho voll abgnervt gsi, bevor i mini «Gambas» badet ha! Ja, aber chum hani die usegworfe, de häts voll krass afa bisse, aber nur so chlises Züg wo nur de Köder abknabbered hät. Gli drufabe hani de e Fisch dra gha: «Ich han en, ich han en - gha....» Und weg isch de Choge gsi. Mitem Zweite ischs mir de genau glich gange, eifach hani der ganz wortlos welle as Ufer zie, zum mi ned nomol so blamiere.
20.01.09 / 20:49 Ortszyt
Mini erschti Biketour
Für der Itrag bruch i ned vill Wort. Die schön Landschaft mues mer eifach gseh ha! Es hät sich also glohnt de Berg uf zchraxle. Nur leider isch mis Bike (Hardtail) halt ned für so grobi Streckene geignet und unterwegs isch mir so allerhand Züg vom Bike weggspickt. Am Schluss hanis praktisch in Einzelteili heibrocht :-D Aber die liebe Jungs händ min Drohtesel schnell wieder uf Vordermaa brocht. Mis Hinter brucht glaubs nochli länger bis das wieder isatzfähig isch. Woni de s zweit mol mit de Tourischte die Tour gfahre bi, de hanis mitem Fully gmacht. Au Frau lernt...
 |
 |
 |
| Sicht in Barranco zume chline Dörfli | gfährlichi Abfahrt bevor mer ufd Strass vo Fataga chunnt |
Riisigi Felse us durlöcherete Lavastei |
20.01.09 / 20:30h Ortszyt
Gran Canaria hät mi wieder zrugg
Hinweistafel im Touristenbus :-D
Sit em Mittwuch, also ez de scho ei Wuche bin i wieder uf Gran Canaria. Die Zyt lauft wahnsinnig schnell und i ha au scho so vill unternoh. Meischtens bini go Bike. Aber au Skate tue i flissig. Also woni acho bi isch scho spektakulär gsi mit mim Gepack und em Bike debi. Bi de zfuhl gsi zu bis zur Busstation z laufe und a eifach gfroged, eb i miteme Tourischtetransfer chan mitfahre. Das hät au prima klapped, er hät mi im letschte Hotel in Maspalomas usglade. Und de bini det im Gjätt us gstande mit em ganze Plunder. Ha mi welle zur nägschte Taxistation schleppe. De fahrt de Chauffeur vom Transfer nomol e schlaufe und frogt wo i de ane mües. Ha de erklärt, dass ich eifach irgendwie uf der Hoger det hinde ufe mues. Ich ha schiinbar so bemitleidenswert usgseh, dass er mi grad wieder ufglade hät und genau vor de Hustür vo minere zuekünftige WG abgsetzt hät. Git ebe doch no netti Mensche uf dere Welt :D
I de WG hani de mini nüe Mitbewohner kenneglernt. Sind drü Jungs us Dütschland und Holland. Mir händs guet mitenand. Sind alles Biker oder Rennvelofahrer. Also sind mir alli chli pikt und verstönd üs prächtig.
 |
 |
 |
| D'Frontasicht wo üsere WG | Dachterrasse uf de WG | Holländischer Mitbewohner Dennis am Doppelburger mampfe |
07.01.09 / 17:14
Ez gohts de gli ab uf Gran Canaria :-D
Hüt isch nuno ei Wuche und de bini im Sunnige Süde. Heilandsack, mues ja no alles packe und organisiere, das wird e huere Stress. Aber i freu mi umso meh wenn i de dunne bi i de WG mit de 3 Jungs.
